تری شان سب سے جدا غوثِ اعظم

از قلم۔ حضرت پیر نصیر الدین نصیر

تری شان سب سے جدا غوثِ اعظم
نہ پہنچے تجھے اولیا غوثِ اعظم

جمالِ رسولِ خدا غوثِ اعظم
جلالِ علی مرتضیٰ غوثِ اعظم

اجابت بڑے پیشوائی کو آگے
اٹھائیں جو دستِ دُعا غوث اعظم

نہ کیوں حل ہوں مُشکل سے مُشکل مسائل
کہ ہیں اِبنِ مشکل کُشا غوثِ اعظم

مزاجِ حسین ابنِ زھرا کے وارث
شبیہِ حسن مجتبی غوثِ اعظم

رسولوں کے انداز نبیوں کے تیوَر
ودیعت ہوۓ تجھ کو یا غوثِ اعظم

زمانے کا ہر پیر زیرِ قدم ہے
ہیں ایسے جگت پیشوا غوثِ اعظم

پہنچتی ہے پھر کیسے نصرت خدا کی
ذرا کہہ کے تو دیکھ یا غوثِ اعظم

نہیں ہے کوئی اور سارے جہاں میں
مرا پیر تیرے سوا غوثِ اعظم

ذرا جلوۂ مصطفیٰ مَیں بھی دیکھوں
ذرا صورت اپنی دیکھا غوثِ اعظم

تیرا دور افسوس! پایا نہ میں نے
کبھی خواب ہی میں تو آ غوثِ اعظم

نہ اٹھتے ہیں خالی نہ اُٹّھیں گے خالی
ترے در سے تیرے گدا غوث اعظم

عنایت سے بھر دیجیے میری جھولی
کرم کیجیے آج یا غوثِ اعظم

مصائب کے طوفاں سے ٹکرا رہا ہوں
میں لے کر تیرا نام یا غوث اعظم

ہوا ہے نہ ہوگا نہ ہے اس جہاں میں
کوئی اور تیرے سوا “غوث اعظم”

کجا یک گدا و کجا شاہ جیلاں
کجا یک فقیر و کجا غوثِ اعظم

سناؤ نہ کیوں اِن کو افسانہ دل کا
کہ ہیں میرے دل آشنا غوث اعظم

اگر اِن سے لو درسِ توحید تم بھی
تو کر دیں اُسے کیا سے کیا غوثِ اعظم

دُرستی عقائد کی کرلو یہاں پر
کہ ہیں قبلۂ حق نما آواز اعظم

نصیرؔ آج آیا ہے بن کر سوالی
اِسے بھی ملے بھیک یا غوثِ اعظم

تیری شان سب سے جدا غوثِ اعظم
نہ پہنچے تجھے اولیا غوثِ اعظم

کلام ۔ پیر سیّد نصیر الدین نصیرؔ جیلانی رحمتہ اللہ تعالیٰ علیہ