کس سے مانگیں ،کہاں جائیں ، کس سے کہیں ، اور دنیا میں حاجت روا کون ہے |
Kis Se Maangeñ, Kahañ Jaayeñ, Kis Se Kaheñ Lyrics in Urdu

حمد باری تعالی جل جلا له

کس سے مانگیں ،کہاں جائیں ، کس سے کہیں

کس سے مانگیں ،کہاں جائیں ، کس سے کہیں ، اور دنیا میں حاجت روا کون ہے
سب کا داتا ہے تو سب کو دیتا ہے تو، تیرے بندوں کا تیرے سِوا کون ہے

کون مقبول ہے ، کون مردود ہے ، بے خبر ! کیا خبر تجھ کو کیا کون ہے
جب تُلیں گے عمل سب کے میزان پر تب کھُلے گا کہ کھوٹا کھرا کون ہے

کون سُنتا ہے فریاد مظلوم کی ، کس کے ہاتھوں میں کُنجی ہے مقسُوم کی
رزق پر کس کے پلتے ہیں شاہ و گدا ، مسند آراۓ بزمِ عطا کون ہے

اولیا تیرے محتاج اے ربّ کُل ! تیرے بندے ہیں سب انبیاء و رُسُل
اِن کی عزت کا باعث ہے نسبت تِری اِن کی پہچان تیرے سوا کون ہے

میرا مالک مِری سُن رہا ہے فُغاں ، جانتا ہے وہ خاموشیوں کی زُباں
اب مری راہ میں کوئی حائل نہ ہو ، نامہ بر کیا بَلا ہے ، صبا کون ہے

ابتدا بھی وہی ، انتہا بھی وہی ، ناخدا بھی وہی ہے ، خدا بھی وہی
جو ہے سارے جہانوں میں جلوہ نُما ، اُس اَخَد کے سِوا دوسرا کون ہے

وہ حقائق ہوں اَشیا کے یا خشک و تر ، فہم و ادراک کی زد میں ہیں سب ، مگر
ماسِوا، ایک اس ذاتِ بے رنگ کے فہم و ادراک سے ماورٰی کون ہے

انبیا ، اولیا ، اہل بیتِ نبی ، تابعین و صحابہ پہ جب آ بنی
گِر کے سجدے میں سب نے یہی عرض کی، تُو نہیں ہے تو مشکل کُشا کون ہے

اہل فکر و نظر جانتے ہیں تجھے ، کچھ نہ ہونے پہ بھی مانتے ہیں تجھے
اے نصیر ! اس کو تو فضل باری سمجھ ، ورنہ تیری طرف دیکھتا کون ہے

شاعر: پیر نصیر الدین نصیر گیلانی رحمتہ اللہ علیہ

Shayar

Naat Khwan:

Qawwali