Shikwa Kyun Ziyankar Banu | Allama Iqbal | Sabri Brothers

Shikwa : Kyun Ziyankar Banu Lyrics

Qawwal: Sabri Brothers

Poet: Hazrat Allama Iqbal r.a.

 | हिन्दी लिरिक्स |


Aye Khuda Shikwa-e-Arbab-e-Wafa bhi sun le

Khoo-gar-e-Hamd se Thoda sa Gila bhi sun le

 

Kyuñ Ziyañkaar banooñ, Sood faramosh rahooñ

Kyun Ziyankar banu, Sood faramosh rahooñ

Fiqr-e-Farda na karooñ, Mahw-e-Gham-e-Dosh rahooñ

Naale Bulbul ke sunooñ aur Hamatan-Gosh rahooñ

Humnawa maiñ bhi Koi Gul hooñ ke Khamosh rahooñ



Jurrat-aamoz meri Taab-e-Sukhan hai Mujh ko

Shikwa Allah se Khaakam-ba-Dahan hai mujhko

 

Hai baja, Shewa-e-Tasleem me Mash-hoor haiñ hum

Qissa-e-Dard sunate haiñ ke Majboor haiñ hum

Saaz-e-Khamosh hain, Faryad se Maamoor haiñ hum

Naala aata hai agar Lab pe to Maazur haiñ hum

 

Aye Khuda Shikwa e Arbab e Wafa bhi sun le

Khoo-gar-e-Hamd se Thoda sa Gila bhi sun le

 

Thi to Maujood Azal hi se, Teri Zaat-e-Qadeem

Phool tha zeb-e-Chaman, par na Pareeshañ thi Shameem

Shart-e-Insaaf hai aye Sahib-e-Altaaf-e-Ameem

Boo-e-Gul Phailti kis tarha jo hoti na Naseem

 

Hum ko Jam-eeyat-e-Khatir ye Pareshani thi

Warna Ummat Tere Mehboob ki Deewaani thi

 

Hum se Pehle tha Ajab tere Jahañ ka Manzar

Kahiñ Masjood the Patthar, Kahiñ Maabood Shajar

Khu-gar-e-Paikar-e-Mahsoos thi Insañ ki Nazar

Maanta phir Koi Andekhe Khuda ko kyuñkar

 

Tujh ko Maaloom hai, Leta tha koi Naam Tera

Quwwat-e-Bazu-e-Muslim ne kiya Kaam Tera

 

Bas Rahe the Yahiñ Saljooq bhi Tooraani bhi

Ahl-e-cheeñ, cheen meñ, Iran meñ saasaani bhi

Isi maamoore meñ Aabaad the Yunaani bhi

Isi Duniya meñ Yahudi bhi the Nasraani bhi

 

Par Tere naam pe Talwar Uthayi kis ne

Baat jo Bigdi hui thi wo Banayi kis ne

The hameeñ ek tere Masrka-aaraaoñ meñ

ḳhushkiyoñ meñ kabhi, ladte kabhi dariyaoñ meñ

Deeñ azaaneñ kabhi Europe ke Kaleesaoñ meñ

Kabhī Africa ke tapte hue Sahraaoñ meñ

 

Shaan āñkhoñ meñ na jachti thi jahañ-daaroñ ki

Kalima padhte the hameeñ chhaañw meñ talwaroñ ki …

 

Ham jo jeete the to jungoñ ki Museebat ke liye

Aur marte the tere Naam ki Azmat ke liye

Thi na kuchh Teghzani apni Hukoomat ke liye

Sar-ba-Kaf phirte the kya dahr meñ daulat ke liye

 

Qaum apni jo Zar-o-maal-e-Jahañ par marti

But-faroshī ke ewaz but-shikani kyuñ karti ..

 

Tal na sakte the agar jung meñ ad jaate the

Paañw sheroñ ke bhī maidañ se ukhad jaate the

Tujh se sarkash hua koi to bigad jaate the

Tegh kya cheez hai ham top se lad jaate the

 

Naqsh Hauheed ka har dil pe bithaya ham ne

Zer-e-ḳhanjar bhi ye paigham Sunaya ham ne ..

 

Tu hi kah de ki ukhaada dar-e-ḳhaibar kis ne

Shahr qaisar ka jo tha, usko kiya sar kis ne

Tode makhlooq khudawandoñ ke paikar kis ne

Kaat kar rakh diye kuffaar ke lashkar kis ne

 

Kis ne Thanda kiya Atish-kada-e-irañ ko

Kis ne phir Zinda kiya Tazkira-e-yazdañ ko ..

 

Kaun si Qaum Faqat teri Talabgaar hui

Aur tere liye zahmat-kash-e-paikaar hui

Kis ki Shamsheer jahañgeer, jahañ-dar hui

Kis ki takbeer se duniya teri bedaar hui

 

Kis ki haibat se sanam sahme hue rahte the

Muñh ke bal gir ke hu-allahu-ahad kahte the ..

 

Aa gaya ain ladaayi meñ agar waqt-e-namaz

Qibla-ru hoke zameeñ-bos hui qaum-e-hijaaz

Ek hi saf meñ khade ho gaye Mahmood-o-Ayaaz

Na koi banda raha aur na koi banda-nawaz

 

Banda-o-sahib-o-mohtaj-o-ghani ek hue

Teri sarkar meñ pahuñche to sabhi ek hue

 

Mahfil-e-kaun-o-makaañ meñ sahar-o-shaam phire

Mai-e-tauhid ko le kar sifat-e-jaam phire

Koh meñ dasht meñ le kar tera paigham phire

Aur maloom hai tujh ko, kabhi nakam phire

 

Dasht to dasht haiñ, Dariya bhi na chhode ham ne

Bahr-e-Zulmaat meñ dauda diye ghode ham ne ..

 

Saf’ha-e-dahr se batil ko mitaya ham ne

Nau-e-insañ ko ghulami se chhudaya ham ne

Tere ka’abe ko jabeenoñ se basaya ham ne

Tere qur’an ko seenoñ se lagaya ham ne

 

Phir bhi ham se ye gila hai ki wafa-dar nahiñ

Hum wafa-dar nahiñ, too bhi to dildar nahiñ ..

 

Ummateñ aur bhi haiñ un meñ gunahgar bhi haiñ

Ijz waale bhi haiñ, mast-e-mai-e-pindaar bhi haiñ

Un meñ kaahil bhi haiñ, ghaafil bhi haiñ, hushiyar bhi haiñ

Saikdoñ haiñ ki tere naam se be-zaar bhi haiñ

 

Rahmateñ haiñ teri Aghyar ke Kaashaanoñ par

Barq girti hai to bechaare Musalmaanoñ par ..

 

Büt sanam-khanoñ meñ kahte haiñ musalmān gaye

Hai khushi unko ki ka’abe ke nigahban gaye

Manzil-e-dahr se ooñtoñ ke hudi-ḳhwaan gaye

Apni baghloñ meñ dabaa-e hue qur’aan gaye

 

Khanda-zan kufr hai Ehsaas tujhe hai ki nahi

Apni Tauheed ka kuchh paas tujhe hai ki nahi

 

Ye shikayat nahiñ, haiñ un ke khazaane ma’moor

Nahi mahfil meñ jinheñ baat bhi karne ka shaoor

Qahr to ye hai ki kafir ko mileñ hoor-o-qusoor

Aur bechaare musalmañ ko faqat wada-e-hoor

 

Ab wo Altaf nahi ham pe Inayaat nahiñ

Baat ye kya hai ki pahli si Madaaraat nahi

 

Kyuñ musalmanoñ meñ hai daulat-e-duniya naayaab

Teri qudrat to hai wo jis ki na had hai na hisaab

Tü jo chaahe to uthe seena-e-sahra se habaab

Rah-raw-e-dasht ho sailee-zada-e-mauj-e-saraab

 

Taan-e-aghyaar hai, ruswayi hai, naadaari hai

Kya tere naam pe marne ka ewaz khwari hai

 

Bani aghyar ki ab chaahne waali duniya

Rah gayi apne liye ek khayali duniya

Ham to rukhsat hue, auroñ ne sambhaali duniya

Phir na kahna hui tauheed se khaali duniya

 

Ham to jeete haiñ ki duniya meñ tera naam rahe

Kahiñ mumkin hai ki Saaqi na rahe jaam rahe

 

Teri mahfil bhi gayi chaahne waale bhi gaye

Shab ki aaheñ bhī gayiñ sub-h ke naale bhi gaye

Dil tujhe de bhi gaye apna sila le bhi gaye

Aa ke baithe bhi na the aur nikaale bhi gaye

 

Aa-e Ushshaaq gaye wada-e-farda le kar

Ab unheñ Dhooñdh, charagh-e-rukh-e-zeba le kar

 

Dard-e-laila bhi wahi, qais ka pahlu bhi wohi

Najd ke dasht-o-jabal meñ ram-e-aahu bhi wahi

Ishq ka dil bhi wahi, husn ka jaadu bhi wahi

Ummat-e-ahmad-e-mursil bhi wahi, Tü bhi wahi

 

Phir ye aazurdagi-e-ghair-e-sabab kya maani

Apne shaidaaoñ pe ye chashm-e-ghazab kya maani

 

Tujhko chhoda ke Rasool-e-arabi ko chhoda

But-gari pesha kiya, but-shikani ko chhoda

Ishq ko, ishq ki aashufta-sari ko chhoda

Rasm-e-Salmaan-o-Uwais-e-qarani ko chhoda

 

Aag Takbeer ki Seenoñ meñ dabi rakhte haiñ

Zindagi misl-e-Bilaal-e-Jabashi rakhte haiñ

 

Ishq ki khair wo pahli si Ada bhi na sahi

Ishq ki khair.. khair

 

Be-khatar kood-pada Aatish-e-Namrood meiñ Ishq

Aql hai Mahw-e-Tamaasha-e-Lab-e-Baam abhi

Ishq ki khair.. khair

 

Aql-o-Dil-o-Nagaah ka Murshid-e-Awwaliñ hai, Ishq

Sidq-e-Khaleel bhi hai ishq, Sabr-e-Husain bhi hai, ishq

Maarqa-e-Wujood me, Badr-o-Hunain bhi hai, ishq

Ishq ki khair.. khair

 

Ishq ki ḳhair wo pahli si ada bhi na sahi

Jaada-paimaayi-e-tasleem-o-raza bhi na sahi

Muztarib dil sifat-e-qibla-numa bhi na sahi

Aur paabandi-e-aaeen-e-wafa bhi na sahi

 

Kabhi ham se, kabhi ghairoñ se shanasaayi hai

Baat kahne ki nahiñ tü bhi to harjaayi hai

 

Sar-e-faaraañ pe kiya deen ko kamil tü ne

Ik ishaare meñ hazaaroñ ke liye dil tü ne

Atish-andoz kiya ishq ka haasil toone

Phooñk di garmi-e-ruḳhsaar se mahfil tü ne

 

Aaj kyuñ seene hamāre sharar-aabaad nahiñ

Ham wahi sokhta-saamaañ haiñ tujhe yaad nahīñ ..

 

Chaak is bulbul-e-tanha ki nawaa se dil hoñ

Jaagne waale isi Baañg-e-dara se dil hoñ

Yaani phir Zinda Mai-e-Ahd-e-wafa se dil hoñ

Phir is baada-e-daireena ke pyase dil hoñ

 

Ajami khum hai to kya, Mai to Hijaazi hai meri

Naghma Hindi hai to kya Lai to hijaazī hai meri

Kyuñ Ziyankar banuñ…….

See Translation in English of Shikwa: Kyun Ziyankar banu

Jawabe Shikwa Lyrics Sabri Brothers Qawwali

 

More Qawwalis From:

|Sabri Brothers | | Rahat Fateh Ali Khan | | Nusrat Fateh Ali Khan | | Aziz Miyan | |Naat-e-Paak | 

Shikwa Kyun Ziyankar Banu, Shikwa Kyun Ziyankar Banu, Shikwa Kyun Ziyankar Banu, Shikwa Kyun Ziyankar Banu, Shikwa Kyun Ziyankar Banu, Shikwa Kyun Ziyankar Banu, Shikwa Kyun Ziyankar Banu

Leave a Comment

Your email address will not be published. Required fields are marked *