New Year 2023 Nazm | Hijr | By Arslan Azmi Lyrics
Ye Aisi Raat Hai Jis Raat Maiñ Hassaas Sota Huñ
Maiñ Tumse Door Rah Kar Bhi Tumhare Paas Hota Huñ.
Tumhe To Yaad Bhi Hoga Samañdar Paar Se Maine Tumhe Paigham Bheja Tha
Duaoñ Ka Sahifa Bhi Tumhare Naam Bheja Tha.
Magar Aisa Bhala Hota Hi Kyuñ Hai Rahat e Jaanam
Mujhe Ye Soch Kar Aksar Badi Hairani Hoti Hai.
Bhala Ye Dil Mera Kyuñ Roushni Karta Hai Seene Me
Wa-garna Saal Bhar Dil Me Badi Veerani Hoti Hai.
Maiñ Kya Boluñ Tumhi Bolo Hamara Kaisa Rishta Hai?
Ye Kaisa Aur Kyuñ Choro Hamara Koi Rishta Hai?
Chalo Choro Bhi Rahne do Tumhe Maloom hi Kya Hai
To Bas Fir Mujhko Kahne Do Hamara Ek Rishta Hai.
Jo Maiñ Sabko Batata Huñ Zamana Jis Se Jalta Hai
Tera Dil Jis Se Darta Hai Jo Tum Sabse Chhupate Ho
Saham Jaate Ho Tum Itna Kabhi To Chhor Jaate Ho
Magar Phir Yuñ Bhi Hota Hai Achanak Laut Aate Ho
Tumhare Laut Aane Par Mera Dil Mujhse Kahta Hai
Hamara Ek Rishta Hai
Bichharne Aur Milne Ka
Gayi Yaadoñ Me Jalne Ka
Magar Phir Saath Chalne Ka,
Hamara Ek Rishta Hai.
Aur Aakhir Me Suno Tumse Ye Kahna Bhi Zaroori Hai
Agar Tum Ye Samajhte Ho Ke Tumse Koi Doori Hai
To Phir Sun Lo Naye Saal Par Tumko Bata Deta Huñ Maiñ Itna
Tuhare Bin December Ki Meri Har Shaam Tanha Hai,
Meri Har Shab Adhoori Hai
Chalo Agle December Ki Isi Shab Dekh Lena Tum,
Yehi Kahta Miluñga Maiñ Meri Izzat Nahiñ Jaati
Badi Tabdilyañ Laya Naya Ye Saal Bhi Lekin,
Teri Yaadoñ Me Rahne Ki Meri Aadat Nahi Jaati
Meri Aadat Nahi Jaati.
Written & Recited By: Arslan Azmi (Azlan)